بعض انبیاء کی بعض پر فضیلت
یعنی ہم اپنے علم محیط کے موافق ہر ایک کے ساتھ معاملہ کرتے ہیں۔ جس کو مناسب جانا آدمیوں میں سے پیغمبر بنایا ۔ پھر جس پیغمبر کو چاہا دوسرے پیغمبروں پر کلی یا جزئی فضیلت عنایت کی ۔حضرت شاہ صاحبؒ لکھتے ہیں ۔ "یعنی بعضے نبی تھے کہ (امت کی حد سے زیادہ شرارتوں پر آخر کار) جھنجھلا گئے ۔آپ کا حوصلہ ان سے زیادہ رکھا ہے (اور سب پر فضیلت دی ہے ، لہذا آپ کی خوش اخلاقی اپنے مرتبہ عالی کے موافق ہونی چاہئے) اور خصوصیت سے داؤدؑ کا ذکر کیا کیونکہ دونوں چیزیں رکھتے تھے ، جہاد بھی اور زبور بھی ، سمجھانے کو (وفی الحدیث کان لایفر اذا لاقیٰ) وہ ہی دونوں باتیں یہاں بھی ہیں"۔ قرآن اور جہاد ۔ بعض نے کہا کہ یہاں "زبور" کا ذکر کر کے حضور ﷺ کی فضیلت کلیہ اور امت محمدیہ کے فضل و شرف کی طرف اشارہ فرما دیا ، کیونکہ حضور ﷺ کے خاتم الانبیاء اور اس امت کے اشرف الامم ہونے پر زبور شریف کے مضامین مشتمل تھے ۔ وَ لَقَدۡ کَتَبۡنَا فِی الزَّبُوۡرِ مِنۡۢ بَعۡدِ الذِّکۡرِ اَنَّ الۡاَرۡضَ یَرِثُہَا عِبَادِیَ الصّٰلِحُوۡنَ (انبیاء۔۱۰۵) یعنی محمدًا صلی اللہ علیہ وسلم وامۃ المرحومہ۔