سورہ نحل آیت 123 پر تفسیر عثمانی

حضرت ابراہیم علیہ السلام پر دنیا اور آخرت کے انعامات

اس کا بیان سورہ انعام آیت ۱۶۱ دِیۡنًا قِیَمًا مِّلَّۃَ اِبۡرٰہِیۡمَ حَنِیۡفًا ۚ وَ مَا کَانَ مِنَ الۡمُشۡرِکِیۡنَ کے تحت میں گذر چکا۔ وہاں ملاحظہ کیا جائے ۔ مقصد یہ ہے کہ حلال و حرام اور دین کی باتوں میں اصل ملت ابراہیمؑ ہے ۔ درمیان میں یہود و نصاریٰ کو ان کے حالات کے مناسب بعض مخصوص احکام دیے گئے۔ آخر آپ کو خاتم الانبیاء بنا کر بھیجا ، تا اصل ملت ابراہیمی کو جو غلفت اور تحریف و تصرف بیجا کی دستبرد سے ضائع ہو چکی تھی ، از سر نو زندہ اور روشن کیا جائے ، اور شرک کی تمام رگیں کاٹ دی جائیں ۔ حدیث میں ہے ۔ بُعِثْتُ بِالْسَّمْحَۃِ الْحَنِیْفِیْۃِ الْبَیْضَاءِ اس کی پوری شرح و تفصیل حضرت شاہ ولی اللہؒ نے "حجۃ اللہ البالغہ" میں کی ہے جو قابل دید ہے۔