سورہ طٰہٰ آیت 131 پر تفسیر عثمانی

کفار کے اسباب عیش پر نظر نہ کیجئے

یعنی دنیا میں قسم قسم کے کافروں مثلًا یہود ، نصاریٰ ، مشرکین ، مجوس وغیرہ کو ہم نے عیش و تنعم کے جو سامان د یے ہیں ان کی طرف آپ کبھی آنکھ اٹھا کر بھی نہ دیکھئے (جیسے اب تک نہیں دیکھا) یہ محض چند روزہ بہار ہے جس کے ذریعہ سے ہم ان کا امتحان کرتے ہیں کہ کون احسان مانتا ہے اور کون سرکشی کرتا ہے جو عظیم الشان دولت حق تعالیٰ نے (اے پیغمبر!) آپ کے لئے مقدر کی ہے مثلًا قرآن کریم ، منصب رسالت ، فتوحات عظیمہ ، رفع ذکر ، اور آخرت کے اعلیٰ ترین مراتب اس کے سامنے ان فانی اور حقیر سامانوں کی کیا حقیقت ہے ۔ آپ کے حصہ میں جو دولت آئی وہ ان کی دولتوں سے کہیں بہتر ہے اور بذات خود یا اپنے اثر کے اعتبار سے ہمیشہ باقی رہنے والی ہے بہرحال آپ نہ انکی تکذیب و اعراض سے مضطرب ہوں نہ ان کے سازوسامان اور مال و دولت کی طرف نظر التفات اٹھائیں۔