ذکر اللہ کی تاکید
یعنی جس کام کے لئے بنائےگئے ہو ، وقت آ گیا ہے کہ اپنے بھائی ہارون کو ساتھ لے کر اس کے لئے نکل کھڑے ہو اور جو دلائل و معجزات تم کو دیے گئے ہیں ضرورت کے وقت ظاہر کرو ۔ چونکہ موسٰیؑ پیشتر دعا کرتے وقت کہہ چکے تھے کَیۡ نُسَبِّحَکَ کَثِیۡرًا ۔ وَّ نَذۡکُرَکَ کَثِیۡرًا یہاں وَ لَا تَنِیَا فِیۡ ذِکۡرِیۡ کہہ کر وہ بات یاد دلا دی۔ یعنی اللہ کے نام کی تبلیغ میں پوری مستعدی دکھلاؤ اور تمام احوال و اوقات میں عمومًا اور دعوت و تبلیغ کے وقت خصوصًا اللہ کو کثرت سے یاد کرو۔ کہ اہل اللہ کے لئے کامیابی کا بڑا ذریعہ اور دشمن کے مقابلہ میں بہترین ہتھیار یہی ہے ۔ حدیث میں ہے وانّ عبدی کل عبدی الذی یذکرنی وھو منا جز قرنہ ۔