دو فریق کون ہیں ؟
یعنی پہلے اِنَّ الَّذِیۡنَ اٰمَنُوۡا وَ الَّذِیۡنَ ہَادُوۡا وَ الصّٰبِئِیۡنَ الیٰ آخرہ میں جن فرقوں کا ذکر ہوا ان سب کو حق و باطل پر ہونے کی حیثیت سے دو فریق کہہ سکتے ہیں۔ ایک مومنین کا گروہ جو اپنے رب کی سب باتوں کو من و عن تسلیم کرتا اور اس کے احکام کے آگے سر بسجود رہتا ہے ۔ دوسرے کفار کا مجمع جس میں یہود ، نصاریٰ ، مجوس ، مشرکین ، صابئین وغیرہ ہم سب شامل ہیں ۔ جو ربانی ہدایات کو قبول نہیں کرتے اور اس کی اطاعت کے لئے سر نہیں جھکاتے ، یہ دونوں فریق دعاوی میں ، بحث و مناظرہ میں اور جہاد و قتال کے مواقع میں بھی ایک دوسرے کے مدمقابل رہتے ہیں۔ جیسا کہ "بدر" کے میدان مبارزہ میں حضرت علی ، حضرت حمزہ اور عبیدۃ بن الحارث رضی اللہ عنہم تین کافروں (عتبہ ابن ربیعہ، شیبہ ابن ربیعہ ، اور ولید بن عتبہ) کے مقابلہ پر نکلے تھے ۔ آگے دونوں فریق کا انجام بتلاتے ہیں۔
آ گ کے لباس
یعنی جس طرح لباس آدمی کے بدن کو ڈھانپ لیتا ہے ، جہنم کی آگ اسی طرح ان کو محیط ہو گی۔ یا کسی ایسی چیز کے کپڑے پہنائے جائیں گے جو آگ کی گرمی سے بہت سخت اور بہت جلد تپنے والے ہوں۔