سورہ سبا آیت 37 پر تفسیر عثمانی

دولت فراخی رضا کا معیار نہیں

یعنی مال و اولاد کی کثرت نہ قرب الہٰی کی علامت ہے جیسا کہ اوپر کی آیت میں گذرا۔ اور نہ قرب حاصل کرنے کا سبب ہے۔ بلکہ اس کے برعکس کافر کے حق میں زیادت بُعد کا سبب بن جاتا ہے۔ ہاں مومن اگر مال و دولت کو وجوہ خیر میں صرف کرے اور اولاد کو بہترین تعلیم و تربیت دلا کر نیک اور شائستہ بنائے، ایسا مال و اولاد ایک درجہ میں قرب الہٰی کا سبب بنتا ہے۔ بہرحال وہاں مال و اولاد کی پوچھ نہیں۔ محض ایمان و عمل صالح کی پرشش ہے۔

مومنوں کو نفقات پر اجر عظیم

یعنی کام پر جتنے اجر کا استحقاق ہے اس سے زائد بدلہ ملے گا۔ کم از کم دس گنا اور زیادہ ہوتو سات سو گنا بلکہ اللہ چاہے تو اس سے بھی زیادہ جس کی کوئی حد نہیں۔ وَ اللّٰہُ یُضٰعِفُ لِمَنۡ یَّشَآءُ (بقرہ۔۲۶۱) یہاں ضعف سے مطلقًا زیادت مراد ہے۔