سورہ یوسف، آیت 92

تفسیر عثمانی

شیخ الاسلام مولانا شبیر احمد عثمانی

یوسفؑ بھائیوں سے اتنا بھی سننا نہیں چاہتے تھے ۔ فرمایا، یہ تذکرہ مت کرو آج میں تمہیں کوئی الزام نہیں دیتا۔ تمہاری سب غلطیاں معاف کر چکا ہوں ۔ جو لفظ میں نے کہے محض حق تعالیٰ کا احسان اور صبر و تقویٰ کا نتیجہ ظاہر کرنے کی نیت سے کہے آج کے بعد تمہاری تقصیر کا ذکر بھی نہ ہوگا۔ میں دعا کرتا ہوں کہ تم نے جو خطائیں خدا تعالیٰ کی کی ہیں، وہ بھی معاف کر دے۔ میری مہربانی بھی اسی کی مہربانی کا ایک پرتو ہے۔