مومنین کی قوت کلمہ توحید میں ہے
یعنی حق تعالیٰ توحید و ایمان کی باتوں سے (جن کی مضبوطی و پائداری پچھلی مثال میں ظاہر کی گئ) مومنین کو دنیا و آخرت میں مضبوط و ثابت قدرم رکھتا ہے رہی قبر کی منزل جو دنیا و آخرت کے درمیان برزخ ہے اس کو ادھر یا ادھر جس طرف چاہیں شمار کر سکتے ہیں ۔ چنانچہ سلف سے دونوں قسم کے اقوال منقول ہیں۔ غرض یہ ہے کہ مومنین دنیا کی زندگی سے لے کر محشر تک اسی کلمہ طیبہ کی بدولت مضبوط اور ثابت قدم رہیں گے دنیا میں کیسی ہی آفات و حوادث پیش آئیں ، کتنا ہی سخت امتحان ہو قبر میں نکیرین سے سوال و جواب ہو ، محشر کا ہولناک منظر ہوش اڑا دینے والا ہو ، ہر موقع پر یہ ہی کلمہ توحید ان کی پامردی اور استقامت کا ذریعہ بنے گا۔
بے انصافوں سے مراد یہاں کفار و مشرکین ہیں ، وہ دنیا میں بھی بچلے اور اخیر تک بچلتے رہیں گے ۔ کبھی حقیقی کامیابی کا رستہ ہاتھ نہ لگے گا۔
یعنی اپنی حکمت کے موافق جیسا معاملہ جس کے ساتھ مناسب ہوتا ہے کرتا ہے۔