محشر میں ظالموں کی حالت
یعنی محشر میں سخت پریشانی اور خوف و حیرت سے اوپر کو سر اٹھائے ٹکٹکی باندھے گھبرائے ہوئے چلے آئیں گے ۔ جدھر نظر اٹھ گئ ادھر سے ہٹے گی نہیں ، ہکا بکا ہو کر ایک طرف دیکھتے ہوں گے ذرا پلک بھی نہ جھپکے گی۔ دلوں کا حال یہ ہو گا کہ عقل و فہم اور بہتری کی توقع سے یکسر خالی اور فرط دہشت و خوف سے اڑے جا رہے ہوں گے ۔ غرض ظالموں کے لئے وہ سخت حسرتناک وقت ہو گا ۔ رہے مومنین قانتین ، سو ان کے حق میں دوسری جگہ آ چکا ہے ۔ لَا یَحْزُنُھُمُ الْفَزَعُ الْاَکْبَرُ وَ تَتَلَقَّاھُمُ الْمَلَائِکَۃ (الانبیاء رکوع۷)