بچہ کو دریا میں ڈالنے کا حکم
یعنی موسٰیؑ کو (جو اس وقت نوزائیداہ بچہ تھے) صندوق میں رکھ کر صندوق کو دریا میں چھوڑ دے۔ دریا کو ہمارا حکم ہے کہ اسے بحفاظت تمام ایک خاص کنارہ پر لگائے گا جہاں سے اس کو وہ شخص اٹھا لے گا جو میرا بھی دشمن ہے اور اس بچہ کا بھی واقعہ یہ ہے کہ فرعون اس سال منجموں کےکہنے سے بنی اسرائیل کے بیٹوں کو چن چن کر قتل کر رہا تھا۔ جب موسٰیؑ پیدا ہوئے ان کی والدہ کو خوف ہوا کہ فرعون کے سپاہی خبر پائیں گے تو بچہ کو مار ڈالیں گے اور والدین کو بھی ستائیں گےکہ ظاہر کیوں نہیں کیا اس وقت حق تعالیٰ کی طرف سے یہ تدبیر الہام ہوئی۔ موسٰیؑ کی والدہ نے صندوق نہر میں ڈال دیا۔ دریا کی ایک شاخ فرعون کے باغ میں گذرتی تھی اس میں سے ہو کر صندوق کنارے جا لگا ، فرعون کی بیوی حضرت آسیہ نے (جو نہایت پاکباز اسرائیلی خاتون تھی) بچہ کو اٹھا کر فرعون کےسامنے پیش کیا کہ آؤ ہم تم اسے بیٹا بنا لیں ۔ فرعون کو بھی دیکھ کر محبت آئی۔گو اس نے بیٹا بنانے سے انکار کیا (جیسا کہ بعض روایات سےمعلوم ہوا ہے ) مگر آسیہ کی خاطر سے بیٹوں کی طرح پرورش کیا اور اس طرح حق تعالیٰ کی عجیب و غریب قدرت کا ظہور ہوا۔ (تنبیہ) فرعون کو خدا کا دشمن اس لئے کہا کہ وہ حق کا دشمن تھا اور خدا کے بالمقابل خدائی کا دعویٰ کرتا تھا اور موسیٰؑ کا دشمن اس لئےفرمایا کہ فی الحال تمام اسرائیلی بچوں کےساتھ سخت دشمنی کر رہا تھا۔ اور آئندہ چل کر خاص موسٰیٰؑ کے ساتھ علانیہ دشمنی کا اظہار کرنے والا تھا۔
حضرت موسیٰ علیہ السلام پر القائے محبت
یعنی ہم نے اپنی طرف سےاس وقت مخلوق کےدلوں میں تیری محبت ڈال دی کہ جو دیکھے محبت اور پیار کرے یا اپنی ایک خاص محبت تجھ پر ڈال دی کہ تو محبوب خدا بن گیا۔
یعنی لوگوں کے دلوں میں تیری محبت ڈال دینا اس غرض سے تھا کہ ہماری نگرانی و حفاظت میں تیری پرورش کی جائے۔ ایسے سخت دشمن کےگھر میں تربیت پاتے ہوئے بھی کوئی تیرا بال بینکا نہ کر سکے۔