سورہ طٰہٰ آیت 71 پر تفسیر عثمانی

فرعون کی بیچارگی اور غصہ

یعنی ہم سے بے پوچھے ہی ایمان لے آئے ۔ ہمارے فیصلہ کا بھی انتظار نہ کیا۔ معلوم ہو گیا کہ یہ تمہاری اور موسٰیؑ کی ملی بھگت ہے۔ جنگ زرگری کر کے عوام کو دھوکہ دینا چاہتے ہو جیسا کہ سورہ اعراف میں گذرا۔

یعنی داہنا ہاتھ بایاں پاؤں ، یا بایاں ہاتھ داہنا پاؤں۔

تاکہ تمہارا حال دیکھ کر سب عبرت حاصل کریں۔

فرعون کی دھمکیاں

یعنی تم ایمان لا کر سمجھتے ہو کہ ہم ہی ناجی ہیں۔ اور دوسرے لوگ (یعنی فرعون اور اس کے ساتھی) سب ابدی عذاب میں مبتلا رہیں گے ۔ سو ابھی تم کو معلوم ہوا چاہتا ہے کہ کس کا عذاب زیادہ سخت اور زیادہ دیر تک رہنے والا ہے۔